Хутка месяц, як у Баранавічах па жаданню бацькоў быў адкрыты беларускамоўны клас. Пакуль у ім вучыцца трое дзетак, аднак настаўнікі спадзяюцца на тое, што самы маленькі ў горадзе калектыў вучняў будзе павялічвацца.
Шосты клас, у якім усе прадметы выкладаюцца выключна пабеларуску, у гімназіі № 4 пачаў працаваць з другой чвэрці гэтага навучальнага года згодна з рашэннем гарвыканкама. Раней аналагічны клас існаваў у сярэдняй школе № 14, але ўсе трое яго вучняў пакінулі ўстанову адукацыі, бо паступілі ў гімназіі горада. Двое з іх – менавіта ў чацвёртую гімназію.
У артыкуле 90 Кодэкса Рэспублікі Беларусь аб адукацыі гаворыцца, што мова навучання і выхавання вызначаецца заснавальнікам установы адукацыі з улікам пажаданняў навучэнцаў ці законных прадстаўнікоў непаўналетніх вучняў.
З іншага боку, адкрыццё класа пад двух дзетак, замест 26, калі існуюць дакументы, якія прадугледжваюць аптымізацыю сістэмы адукацыі, – няпростае пытанне. Патрэбна выдзеліць сродкі на памяшканне, на зарплату настаўнікам – а гэта грошы дзяржавы, значыць, і кожнага грамадзяніна, распараджацца імі – вялікая адказнасць. Таму рашэнне аб адкрыцці класа прымалася на ўзроўні гарвыканкама.
Дырэктар гімназіі Вадзім Шчарбакоў спадзяецца, што з цягам часу беларускамоўны клас папоўніць свае рады, і ў трох рабят, якія зараз займаюцца ў ім, з’явяцца новыя сябры – у вялікай кампаніі і вучыцца весялей!
З іншых гімназій вучні маюць права перайсці ў беларускамоўны клас на працягу вучэбнага года. А вось тым, хто сёння займаецца ў школе, трэба дачакацца жніўня: каб стаць гімназістам, неабходна паспяхова вытрымаць уступныя іспыты.
– У горадзе няма ўстановы агульнай сярэдняй адукацыі, дзе б наогул не гучала матчына мова. Але часцей за ўсё яна гучыць на ўроках беларускай мовы і літаратуры. Ёсць дзеткі, для якіх гэтага мала, якія апантана цікавяцца гісторыяй свайго народа, яго творчасцю – непаўторным беларускім фальклорам, захапляюцца айчыннай літаратурай і хочуць кожны дзень практыкавацца ў размове па-беларуску з равеснікамі, – гаворыць Вадзім Шчарбакоў. – Запрашаем іх у нашу гімназію, у клас, дзе на працягу ўсяго школьнага дня размаўляюць на мілагучнай мове Коласа і Купалы. Нават калі вучань не стане выдатным філолагам, абярэ тэхнічную прафесію, такая зацікаўленасць зробіць яго крыху багацей – кожны возьме нешта ад нашага агульнага духоўнага скарбу.
Віталь ГЕРЦАЎ.
