У свеце, дзе экраны мігацяць ярчэй зорак, а гукі лічбавых прылад заглушаюць шэпт старонак, дзіцячая кніга застаецца ціхім, але магутным цудам. Яна – быццам чароўны ключ, што адчыняе дзверы ў сусветы, якіх няма на карце, але якія жывуць у сэрцы.
Прыемна, што супрацоўнікі дзяржаўнай установы культуры "Цэнтралізаваная бібліятэчная сістэма г. Баранавічы" змаглі дакрануцца да гэтага цуду, стаўшы ўдзельнікамі абласнога фестывалю дзіцячай кнігі "Роднай Мышанкі абшары", які расчыніў свае дзверы 19 верасня на базе Баранавіцкай цэнтральнай раённай бібліятэкі імя Я. Чачота. Свята кнігі прайшло ў фармаце літаратурнага пікніка: зялёны парк стаў месцам сустрэч, прэзентацый і творчых майстар-класаў.
Калектыў баранавіцкай бібліятэчнай сістэмы прадставіў інтэрактыўную пляцоўку "Славім кніжку беларускую". Гасцей цешылі і ўражвалі інтэлектуальныя гульні, філворды, яркія фотазоны, і, вядома, мноства кніг – ад класікі да навінак беларускай дзіцячай літаратуры.
На працягу дня наведвальнікі пляцоўкі з вялікай цікавасцю і непадробным захапленнем бралі ўдзел у літаратурных і рухомых гульнях, якія не толькі забаўлялі, але і абуджалі ўяўленне, пашыралі кругагляд і стваралі атмасферу творчага натхнення.
Асабліва цікава было назіраць за тым, як кожны юны ўдзельнік атрымаў унікальную магчымасць не проста дакрануцца да свету кнігі, але і літаральна стаць яе часткай, пераўвасобіўшыся ў героя казкі "Коцік, пеўнік і ліска". У атмасферы творчасці і гульні дзеці раскрывалі свае таленты, спрабуючы сябе ў ролі акцёраў, ажыўляючы персанажаў і напаўняючы сюжэт яркімі эмоцыямі.
Маленькія госці з вялікім захапленнем далучыліся да чароўных прыгод, якія падрыхтавалі героі кнігі "Муры, Том і дырыжаблік" – дапытлівая кошачка Муры і яе мудрая мама Кошка. Дзеці разам з героямі расчароўвалі незвычайны горад, вучыліся сябраваць і дапамагаць адно аднаму.
Спецыяльна аформленая фотазона "У свет дзяцінства з кнігай" падарыла магчымасць спыніцца на хвілінку і адлюстраваць самыя яркія імгненні дня, ператварыўшыся ў атмасферную прастору, напоўненую цяплом і радасцю.
Сённяшні дзень стаў не проста святам кнігі, ён натхніў на творчасць, аб'яднаў аднадумцаў, умацаваў сувязь пакаленняў, даў магчымасць пазнаёміцца з майстрамі слова, а таксама паказаў, што кніга – гэта не толькі крыніца ведаў, але і нагода для прыемнай гутаркі і нечаканых адкрыццяў.
Кацярына Раманюк, бібліятэкар І катэгорыі ЦГБ імя В. Таўлая
Фота прадастаўлена ЦГБ імя В. Таўлая
