Вясна ўжо на парозе, але зіма не здаецца: не-не, то сняжком зацярушыць, то сіверам павее. Тольку ў аграгарадку Мір Баранавіцкага раёна ўсе ўпэўнены: вось-вось уцячэ холад, бо пасля такой вясёлай Масленіцы інакш і быць не можа. З танцамі, песнямі, жартамі, конкурсамі праважалі мірскія школьнікі зіму, у час якой шмат працавалі, вучыліся і займаліся спортам. На масленічнае гулянне запрасілі да сябе сяброў з Ляснянскай і Палонкаўскай школ. У гэтых школах мірскія дзеці самі неаднаразова гасцявалі, праводзілі шматлікія мерапрыемствы ў межах рэалізацыі інавацыйнага праекта. Разгуляліся ўсе разам так, што і разыходзіцца не хацелася.
Тэатралізаваная дзея ў выкананні старшакласнікаў закончылася спальваннем пудзіла Масленіцы – старадаўнім абрадам нашых продкаў.
Самай жа прыемнай часткай свята стала частаванне. Якіх толькі бліноў не нагатавалі дарослыя і дзеці: з варэннем, тварагом, салам… Ды і госці са сваімі пачастункамі прыехалі. Ногі самі прасіліся ў пляс пасля кубачка чаю з печывам ці блінамі.
Закончылася мерапрыемства, але дзеці яшчэ доўгі час не маглі супакоіцца, настроіцца на вучэбны лад. Надоўга хопіць уражанняў!
Вось дык Масленіца! Ну і Масленіца, удалася на славу!
