Сёння ў музеі-сядзібе Адама Міцкевіча ў Баранавіцкім раёне было надзвычай шматлюдна: тут прайшоў маштабны літаратурна-музычны фестываль «Восень у Завоссі», які сабраў усіх, чыё сэрца належыць літаратуры, гісторыі, музыцы і любові да роднай мовы.
Фестываль ладзіцца ўжо не ўпершыню. Яго арганізатарамі традыцыйна выступаюць Дзяржаўны музей гісторыі беларускай літаратуры, філіялам якога з’яўляецца наш музей-сядзіба Міцкевіча, Баранавіцкі райвыканкам і Саюз пісьменнікаў Беларусі.
– Адам Міцкевіч – адзін з людзей, дзякуючы якім мы ганарымся, што мы – беларусы і жывём у такой цудоўнай краіне, – адзначыў на цырымоніі адкрыцця фестывалю старшыня Баранавіцкага райсавета дэпутатаў Сяргей Сліва. – Гэтага чалавека сваім нацыянальным паэтам лічаць адразу тры дзяржавы: Беларусь, Польшча і Літва. І вельмі прыемна, што менавіта тут, на яго радзіме, ладзіцца ўжо каторы год гэты фестываль. Хочацца, каб ён жыў і далей, збіраючы яшчэ большае кола наведвальнікаў, тым больш, што наступны год для Міцкевіча – юбілейны.
Сярод пакрытых чаротам драўляных будынкаў у месцы, дзе нарадзіўся Адам Міцкевіч, наведвальнікі ў гэты дзень змаглі сапраўды адчуць атмасферу шляхецкага двара другой паловы ХVІІІ стагоддзя, даведацца пра жыццё і побыт беларускіх шляхціцаў, дакрануцца да літаратурнай і музычна-спеўнай спадчыны той пары.
Свае вырабы прадставілі ў «Горадзе майстроў» рамеснікі нашага краю, а аматарскія аб’яднанні ўстаноў культуры прапанавалі пачастункі – стравы нацыянальнай беларускай кухні.
Гасцей свята чакала насычаная праграма, разлічаная на розны густ і ўзрост: займальныя лекцыі, цікавыя экскурсіі па сядзібе, выступленні літаратараў, праграма мастацкай самадзейнасці, бібліятэчная пляцоўка, мастацкі пленэр, выставы, квэсты, гульні і майстар-класы.
Таксама працавала інтэрактыўная пляцоўка гістарычнай анімацыі ад рэканструктара Юрыя Усціновіча, а на галоўнай сцэне фестывалю, акрамя лепшых салістаў і творчых калектываў Баранавіцкага раёна, выступіў фолк-рок гурт «Тутэйшая шляхта» і папулярны арт-гурт «Беларусы».
Падрабязнасці – у бліжэйшым нумары газеты «Наш край».
Алена РАКУЦЬ
Фота аўтара
